எனக்கான தனிமை..!

எனக்கான தனிமை - அதை

என்னிடம் விட்டிடுங்கள்..

அதில் உங்களுக்கான இடமில்லை..

அது - என் வலிகளால்

நான் அழுதிடும்

நேரம்...

அதில் உங்களுக்கு இடமில்லை...

உங்களை மகிழ்வித்து

மகிழ்ந்து கிடக்கும்

அந்த 'நான்'

முகத்திரை கலைய

தேடிடும் நேரம் தான்

தனிமை..

நத்தை முதுகில்

பாரமேற்றி - அதை

இரசித்துப் பார்க்கும்

வக்கிர காலம்..

வலிகள் தீர

இறக்கி வைக்க

முடியா பாரம்..

என் முகத்தில்

காரி உமிழ்ந்த

ஏமாற்றங்கள்

என் கனவுச் சிறகை

சிறை பிடித்த

பாரங்கள்..

என் முகத்துப் புன்னகை

போலியாக்கிய

போலிகள்..

இவையெல்லாம் நினைவு

வந்து - நான்

அழுதிடும் நேரம்

அந்த 'தனிமை'..

உள்ளூரிய இரணங்கள்

அழுது ஆற்றப்படாதவரை

உங்களின் 'ஆறுதல்'

களிம்புகள் வேலை

செய்யப்போவதில்லை..

ஆகவே

என் தனிமையில் - உங்களுக்கான

இடம் தேடாதீர்..

அதில் உங்களுக்கு

இடமில்லை....